یہ کم نہیں علی کی فضیلت کے واسطے
گھر دے دیا خدا نے ولادت کے واسطے
قرآن پاک نہج بلاغت کے واسطے
آئینہ جیسے رکھا ہو صورت کے واسطے
ہیں اہل خلد بھی جہاں خدمت کے واسطے
ہم خاکسار ہیں وہاں مدحت کے واسطے
روشن ہے مصحف رخ مولائے کائنات
قرآن آرہا ہے تلاوت کے واسطے
چاندی سخاوتوں کی علی بانٹتے رہے
سونا بچا لیا شب ہجرت کے واسطے
مدح علی سنائیے بچوں کو رات دن
نسخہ بتا رہاہوں ذہانت کے واسطے
چہرا علی کا سورہ رحمان کی قسم
کام آگیا تعارف قدرت کے واسطے
میثم فراز دار سے اعلان کرگئے
دل چاہیے علی سے محبت کے واسطے
جو پوچھنا ہو مجھ نکیرین پوچھ لو
اب آگئے علی مری نصرت کے واسطے
مل جائے گا لٹی ہوئی آنکھوں کو اعتبار
موسی چلو نجف کی زیارت کے واسطے
اے بوریا نشیں ترے در کا فقیر ہوں
رضواں اٹھا نہ مجھے جنت کے واسطے
نیر علی کے نام کی کرنوں سے بھیک مانگ
سورج کے پاس کیا ہے تری چھت کے واسطے
کوئی تبصرہ نہیں! سب سے پہلا تبصرہ کرنے والے بنیں۔